حساب

راځه چې سره کښېنو د محبت خبرې وکړو
په ټينګ عزم متين د حقيقت خبرې وکړو

که ماکړي که تاکړی د خداى په وړاندې کښېږدو
له ځان سره رښتيا د قضاوت خبرې وکړو

دوکه اوچا لاکي وچل بازي پريږ دو وشاته
ماشوم غوندې يوځل دصداقت خبرې وکړو

دخپلو منافعو خيال مغزوکې پيدا نکړو
په ژبه د افغان او دملت خبرې وکړو

په حا ل د کونډو رنډو يتيمانو ځان خبر کړو
د بورو، پلار او مور د اذ يت خبرې وکړو

په خپل ګرېوان کې ځا نته دمحشرقضاوت جوړ کړو
جزاته د دوزخ او دجنت خبرې وکړو

يوځلې فرض د ناز نازاولادونه يتيمان کړو
شهيد سره د ده د شهادت خبرې وکړو

تالاچې يې کورونه سوه فراره سوه له کلي
دهغو مهاجرو د حالت خبرې وکړو

چې مات يې اندامونه يايې قطع لاس او پښې وي
فلجانوسره ټوله دنعمت خبرې وکړو

ړندوته چې يې سترګي د الله په لاره تللي
د لارې او د نور د هدايت خبرې وکړو

دهغو مسکينانو فقيرانو حال په ځان کړو
نادارو سره دغه د دولت خبرى وکړو

بيا و وايو ځواب د دوی دټولو وسوالو ته
په ډاګه بیاد خپل مسئوليت خبرې وکړو

حساب ورکړو دسپینوبنګلواو لوکسو موټرونو
د خپلو اصرافونو او راحت خبرې وکړو

داښه دى چې يوځلې دمرګ وړاندې مرګ ته ورسو
له ځان سره د ځان د جنايت خبرې وکړو

که ورکړوقناعت بيا به کاميا ب یوپه دارینو
بيا نسته ضرورت چې د حسر ت خبرې وکړو

ضعيفه! ازار مه اخله په آه د مظلومانو
په ځاى د نفرتو به د الفت خبرې وکړو

ويناوال: مولوي عبدالسلام ضعيف