وروستي:

د سولې پيغمبر!

مفتي حکیم الله صابر الحنفي

رسول الله ﷺ د مکې مکرميې د فتحي په ورځ د خپلو سرتیرو ملګرو سره د مدینې منورې څخه د مکې مکرمې پر لور په خورا عظمت او دبدبه راروان وو ، دومره ستر لښکر په دې سیمه کي چا نه وو لیدلی ، فوځ د یوه سیلاب په څیر ښکاریده.

د تیارې پر مهال د اسلامي فوځ لخوا د اورونو بلیدل داسي ښکاریدل لکه ټولو أهل حجازو چي پر مکه مکرمه برید کړی وي.

د مکې ستر ــ ستر جګړه ماران چي د مسلمانانو پر خلاف په ګڼو ډګرونو کي جنګیدلي وه او د رسول الله ﷺ د دعوت پر مهال یې پر مسلمانانو خورا زیات ظلمونه کړي وه ، له دې ستر لښکر څخه د تيښتي په حال کي وه. ځکه هر وګړی د خپلو بدو أعمالو په وجه خورا سخت ډاریده او فکر یې کاوه چي نن به حتماً په مکه مکرمه کي د وینو ویالې وبهیږي.

د أبو جهل ځوي عکرمه د سمندر پر لور منډه کړه، أبو سفیان چي د مسلمانانو پر ضد یې د کفارو مشري کړې وه سختي ویري أخیستی وو او د حضرت عباس رضي الله عنه په وسیله یې له رسول الله ﷺ څخه د سولي غوښتنه وکړه ، رسول الله صلی الله علیه وآله وسلم ورته وویل : چاچي د أبوسفیان (رضی الله عنه) په کور کي پناه واخیسته په أمن دی ، چاچي کعبي ته پناه یو وړه په أمن دی او چاچي د خپلو کورونو دروازې وتړلې په أمن دي.

ټولو خلکو داسي فکر کاوه چي نن به د مکې له مشرکینو څخه د انتقام أخیستلو ورځ وي. خو د سولي پیغمبر صلی الله علیه وآله وسلم وویل : نن د انتقام ورځ نه بلکي د رحم ، شفقت او کرم ورځ ده هیڅ څوک دي نه ویریږي ، د عمومي عفوي اعلان یې وکړ. هـو ! په دې ورځ رسول الله صلی الله علیه وآله وسلم د خپل سر قاتلینو او د ګڼو مسلمانانو وژونکو ته په وینا کي وویل : تاسـو أزاد یاست ، نــن زه لــه تاسو ســره د حضرت یوســف علی نبینا وعلیه الصلاة والسلام د ورونو په څیر معامله کوم .

رب العزت وایي : «قَالَ لَا تَثْرِيبَ عَلَيْكُمُ الْيَوْمَ ۖ يَغْفِرُ اللَّهُ لَكُمْ ۖ وَهُوَ أَرْحَمُ الرَّاحِمِين».
(سورة یوسف آیتــ92).

ژباړه : نن ورځ پر تاسي باندی زما له طرفه هیڅ سرزنش او ملامتیا نشته ، الله جل جلاله دي تاسو ته بخښنه وکړي او هغه تر ټولو بهترین رحم کونکی دی.

(البدایة والنهایة للامام ابن کثير جــ۴ صــ۳۳۱).

څرګندونه مو لاندې وليکئ

ستاسو برېښناليک خوندي دی.


*