يوچينايي مسلمان د حج ادا کولو لپاره مکې مکرمې ته په بايسکل تللی
Image processed by CodeCarvings Piczard ### FREE Community Edition ### on 2016-08-21 10:40:02Z | | .<I)8B+:B/?E1ZèÝ4D
انس افغان – رسنۍ
يو چينايي مسلمان توانېدلی چې د چين له سينګيانګ ايالت څخه مکې مکرمې ته زرګونه کلومتره مزل په بايسکل را لنډ کړي.
نوموړي دومره ډېر مزل د دې لپاره کړی چې سږ کال د حج فريضه ادا کړي.
نوموړي مسلمان چې محمد ماباوچين نومېږي اراده لرله چې د چين له سينګيانګ څخه پاکستان ته ولاړ شي او له هغه ځايه بيا د افغانستان له لارې ايران، عراق او بيا سعودي عربستان ته ورسېږي؛ خو دا چې په اسلام آباد کې د سعودي عربستان سفارت ويزه ورنه کړه؛ نو اړ شو چې د الوتکې له لارې بحرين ته ولاړ شي، هلته يې د سعودي عربستان ويزه تر لاسه کړه او بيا له بحرين څخه د ملک فهد د مشهور پول له لارې د سعودي عربستان خاوري ته داخل شو، دمام، رياض او بالاخره يې ځان طائف ته ورساوه.
نوموړي د خپل سفر نژدې 8150 کيلو متره مزل په بايسکل تر سره کړی او په درې میاشتو کې يې د (وادي محرم) ميقات له لارې حرم ته ځان رسولی.
د دې سفر په لړ کې د سعودي عربستان په بېلابېلو سيمو کې سعودي ځوانانو پر بايسکلونو د نوموړي تود هرکلی کړی او تر حرمه يې بدرګه کړی دی.
د يادونې وړ ده چې چينايي مسلمانان له ډېرو کلونو راهيسې د حج د ادا کولو اجازه نه درلودله، خو د نړۍ د مسلمانانو د فشار له امله د چين حکومت اړ شو چې د سينګيانګ مسلمانانو ته د حج د ادا کولو اجازه ورکړي؛ خو دا اجازه محدوده ده او هر چينايي مسلمان کولای شي په ژوند کې يوازې يو ځل حج وکړي، له همدې امله چې کله چينايي مسلمانان له حرم څخه را رخصتېږي په چيغو چيغو ژاړي ځکه چې دا يې د الله کور ته لومړی او وروستنی راتګ وي.
